Bændaglíma GR 2019: Í ár verður 80‘s þema – þátttakendur hvattir til að túpera toppinn, skella í hliðatagl og hrista fram grifflurnar

Bændaglíma GR 2019: Í ár verður 80‘s þema – þátttakendur hvattir til að túpera toppinn, skella í hliðatagl og hrista fram grifflurnar

Nú er komið að síðasta innanfélagsmóti ársins hjá Golfklúbbi Reykjavíkur, Bændaglíman 2019 verður haldin á Grafarholtsvelli laugardaginn 21. september. Mótið er síðasta innanfélagsmót ársins svo um er að gera að skrá sig til leiks og loka golfsumrinu með 80‘s stæl. Veitt verða verðlaun fyrir þrjú efstu sætin í liðakeppni og nándarverðlaun þeim leikmanni sem næstur er holu eftir upphafshögg á öllum par 3 holum vallarins.

Tekið verður á móti þátttakendum með borði hlaðið veitingum í klúbbhúsi áður en leikur hefst. Að leik loknum verður blásið til kvöldverðar í klúbbhúsinu hjá Sigrúnu og hennar góða starfsfólki.

Kvennanefnd GR mun mæta á svæðið og framreiða veitingar ofan í keppendur á meðan á leik stendur. Mótssstjóri verður Atli Þór Þorvaldsson.

Veislustjóri kvöldsins verður Björk Jakobsdóttir sem er þekkt fyrir að vera fumlaus og hress í sinni framkomu, hvort sem um veislustjórn eða uppistand er að ræða. Félagsmenn mega eiga von á hressandi kvöldi í frábærum félagsskap á þessu lokakvöldi tímabilsins.



Skráning í mótið hefst mánudaginn 16. september kl. 12:00 á golf.is. Hámarksfjöldi er 132 keppendur. Mikilvægt er að þeir sem ætla að spila saman í holli séu skráðir saman í rástíma. Mótsgjald er kr. 7.000 á mann og greiðist hjá veitingasala þegar mætt er.

Mæting í mótið er kl.13:00 og verður ræst út af öllum teigum samtímis kl.14:00.

Við minnum á að aldurstakmark til þátttöku er 20 ár.

Leikfyrirkomulag mótsins er Texas scramble höggleikur með forgjöf, fjórir leikmenn saman í liði. Forgjöf liðs er samanlögð vallarforgjöf leikmanna deilt með 10. Hámarksforgjöf sem gefin er til hvers leikmanns er 36. Til að gera leikinn ennþá skemmtilegri verður eftirfarandi regla í gildi: Skylt verður að velja að minnsta kosti tvö teighögg frá hverjum liðsmanni.  Annað hinna völdu teighögga verður að vera á par 3 holu.

Bændur í ár verða þeir Steingrímur Gautur Pétursson og Stefán Steinssen. Þeir félagar eru mörgum GR-ingum vel kunnir enda miklir kylfingar og stuðboltar þar að auki.

Hlökkum til að sjá ykkur og slútta þessu frábæra golftímabili saman!

Kveðja,
Stjórn og starfsfólk Golfklúbbs Reykjavíkur.

Til baka í yfirlit