Fjórði vinavöllur GR 2020 er Húsatóftavöllur hjá Golfklúbbi Grindavíkur

Fjórði vinavöllur GR 2020 er Húsatóftavöllur hjá Golfklúbbi Grindavíkur

Eins og félagsmenn hafa orðið varir við þá er kynning á vinavöllum GR 2020 komin vel af stað og hefur áframhaldandi samningur nú verið undirritaður við Golfklúbb Grindavíkur. Þetta er fimmta árið í röð sem klúbbarnir gera með sér vinavallasamning og hefur Húsatóftavöllur verið vel sóttur af félagsmönnum GR.

Húsatóftavöllur liggur við þjóðveginn að Reykjanesvita, vestan við Grindavík, um 7 km frá Bláa Lóninu. Völlurinn er 18 holur, fimm þeirra eru á bökkunum með sjónum en þrettán eru norðan þjóðvegarins og teygja sig skemmtilega inn í hraunið. Uppbygging hjá Golfklúbbi Grindavíkur hefur verið mikil á undanförnum árum og hefur klúbburinn upp á allt að bjóða fyrir kylfinga sem mæta til leiks.

Félagsmenn GR greiða kr. 2.600 í vallargjald í hvert sinn sem þeir leika á Húsatóftavelli og skiptir þá ekki máli hvort leiknar séu 9 eða 18 holur. Áður en leikur hefst skal framvísa félagsskírteini og greiða vallargjald í afgreiðslu Golfklúbbs Grindavíkur. Samkomulagið gildir ekki ef félagsmenn leika með hópum, sem gert hafa sérstaka samninga um afslætti af vallargjöldum, eins og t.d. fyrirtækjamót.

Vefsíðu Golfklúbbs Grindavíkur má finna hér

Húsatóftavöllur er fjórði vinavöllurinn sem kynntur hefur verið fyrir komandi sumar. Þeir vellir sem áður hafa verið kynntir sem vinavellir GR 2020  eru Svarfhólsvöllur hjá Golfklúbbi Selfoss, Hlíðarendavöllur hjá Golfklúbbi Skagafjarðar og Kirkjubólsvöllur hjá Golfklúbbi Sandgerðis.

Þegar nær dregur vori verður kynnt frekar fyrir félagsmönnum hvernig bókun á vinavöllum fer fram í nýju tölvukerfi, Golfbox.

Með óskum um góða helgi,
Golfklúbbur Reykjavíkur

 

Til baka í yfirlit