Heimslistamótaröðin - leiknir verða þrír hringir á tveimur dögum, skráning á golf.is

Heimslistamótaröðin - leiknir verða þrír hringir á tveimur dögum, skráning á golf.is

Þriðja umferð í Heimslistamótaröðinni verður leikin á Korpúlfsstaðarvelli dagana 14. og 15. september, leiknir verða þrír hringir á tveimur dögum og verða lykkjur mótsins Sjórinn/Áin. Upplýsingar um mótið má finna hér fyrir neðan:

Leikfyrirkomulag
Höggleikur í flokki karla og kvenna, alls 54 holur. Leiknar eru 36 holur fyrri mótsdag og 18 holur seinni mótsdag. Keppt skal samkvæmt móta- og keppendareglum GSÍ.

Rástímar og ráshópar
Rástímar verða birtir á golf.is eftir kl.12:00 á fimmtudegi fyrir mót, 12. september. Á fyrsta keppnisdegi raðar mótsstjórn í ráshópa en á seinni degi verður raðað út eftir skori. Fyrsti hringur verður ræstur út frá kl. 8:00, annar hringur kl. 13:30 og lokahringur frá kl. 12:00. Ath. að þessir tímar eru til viðmiðunar og geta breyst.

Þátttökuréttur
Hámarksfjöldi kylfinga í mótið er 30. Þátttökurétt hafa áhugamenn með íslenskan ríkisborgararétt. Í karlaflokki er hámarksforgjöf 5,5 og í kvennaflokki 8,5 og skulu keppendur vera meðlimir í golfklúbbi innan GSÍ. Ef skráningar eru fleiri en hámarksfjöldinn falla niður skráningar þeirra leikmanna sem næstir eru forgjafarmörkum síns kyns. Þó skulu að lágmarki níu leikmenn eiga rétt á þátttöku af hvoru kyni. Ef tveir eða fleiri kylfingar eru jafnlangt frá forgjafarmörkum síns kyns ræður hlutkesti því hverjir fá þátttökurétt. Ef fjöldi kylfinga sem fá þátttökurétt af hvoru kyni er ekki heilt margfeldi af þremur er hámarksfjöldi leikmanna aukinn svo að þrír keppendur verði í hverjum ráshópi.

Karlar leika af hvítum teigum og konur af bláum teigum

Þátttökugjald er 8.000 kr.

Skráning og þátttökugjald
Skráning í mótið hefst föstudaginn 6. september kl.12:00 á golf.is.  Þátttakendur skulu skrá sig í mótið fyrir kl. 23:59 þriðjudaginn 10. september. **Engar undantekningar á skráningu verða leyfðar í mótið eftir að skráningu lýkur** Þátttökugjöld verða ekki endurgreidd ef afboðun kemur eftir að skráningarfresti lýkur. Forföll skal tilkynna með tölvupósti á netfangið motanefnd@golf.is.

Æfingahringur
Einn æfingahringur án endurgjalds er heimilaður. Vinsamlegast hafið samband við klúbbinn til að panta rástíma í síma 585-0200. Reglur um æfingahringi er að finna í klúbbhúsinu. Skilyrði fyrir æfingahring er að búið sé að greiða þátttökugjald.

Keppendur fá æfingabolta fyrir hring án endurgjalds á mótsdögum í Básum.

Verðlaun
Veitt verða verðlaun fyrir 1. – 3. sæti í flokki karla og kvenna.

Ef keppendur eru jafnir í fyrsta sæti verður leikinn bráðabani, en að öðru leyti gilda móta- og keppendareglur GSÍ. Ef keppendur eru jafnir í öðrum sætum skiptast verðlaun jafnt milli þeirra keppenda. Gert er ráð fyrir að verðlaunaafhending hefjist 15 mínútum eftir að síðasti ráshópur lýkur leik.

Dómari: Aron Hauksson
Mótsstjóri: Harpa Ægisdóttir
Mótsstjórn: Harpa Ægisdóttir, Ómar Örn Friðriksson, Snorri Páll Ólafsson

Til baka í yfirlit