Ný mótaröð fyrir félagsmenn: Örninn Golfverslun - mótaröð GR

Ný mótaröð fyrir félagsmenn: Örninn Golfverslun - mótaröð GR

Golfklúbbur Reykjavíkur kynnir nýja innanfélagsmótaröð í samstarfi við Örninn Golfverslun. Þessi nýja mótaröð ber nafnið Örninn Golfverslun – mótaröð GR og er um að ræða aldursflokkaskipta punktakeppni. Keppnin er fyrir fullgilda meðlimi GR sem hafa náð nítján ára aldri.

Leikið verður vikulega til skiptis á Korpúlfsstaðavelli og Grafarholtsvellli. Keppendur geta valið hvort þeir leiki á mánudegi eða þriðjudegi í hverri leikviku, þannig að hver umferð stendur tvo daga og hægt er að velja hvorn daginn leikið er. Mótaröðin stendur frá mánudeginum 28. maí og endar þriðjudaginn 31. júlí. Ekki er leikið meistaramóts¬vikuna.

Fyrirkomulag mótaraðarinnar er punktakeppni þar sem keppendur geta valið sér teiga (hvíta, gula, bláa eða rauða) við hæfi og taka forgjöf samkvæmt völdum teigum. Leikmenn verða að merkja á skorkort af hvaða teigum leikið er. Leikvikur eru 10 talsins og gilda 6 bestu skorin á mótaröðinni.

Um aldursflokkakeppni er að ræða og verða veitt verðlaun í fjórum flokkum karla og kvenna, alls átta flokkum. Sama aldursskipting er í báðum flokkum en þeir eru:

  • 19-29 ára
  • 30-49 ára
  • 50-64 ára
  • 65 ára og eldri

Punktahæsti einstaklingurinn óháð flokkum verður útnefndur punktameistari GR.
Frekari upplýsingar um mótaröðina verða kynntar þegar nær dregur sumri.

Golfklúbbur Reykjavíkur þakkar Örninn Golfverslun fyrir að vera styrktaraðili á þessari glæsilegu mótaröð.

Golfklúbbur Reykjavíkur

Til baka í yfirlit