Þrír af okkar fremstu atvinnukylfingum hefja í dag leik á 2. stigs úrtökumótum fyrir DP World Tour sem er sterkasta mótaröð Evrópu. Þeir Dagbjartur Sigurbrandsson, Guðmundur Ágúst Kristjánsson og Haraldur Franklín Magnús hefja allir leik í dag á þremur mismunandi völlum á Spáni en fjögur úrtökumót eru leikin samtímis dagana 30. október – 2. nóvember. Í hvert mót mæta 72 kylfingar til leiks og spila um 24 laus sæti í lokaúrtökumótinu.
Guðmundur Ágúst vann sitt úrtökumót í Svíþjóð og tryggði sér með því sæti á 2. stiginu.
Guðmundur leikur á Fontanals Golf Club vellinum í Girona. Guðmundur lék völlinn fyrr á árinu í Challenge de España mótinu á HotelPlanner Tour, og lauk þar leik í 47. sæti á sex höggum undir pari.
Fontanals Golf Club
Hér má fylgjast með stöðunni hjá Guðmundi
Dagbjartur lék vel í sínu úrtökumóti í Danmörku, endaði þar jafn í 8. sæti og var í öruggu sæti frá upphafi móts.
Dagbjartur leikur á Desert Springs Golf Club svæðinu í Almería. Á meðal keppenda eru núverandi kylfingar DP mótaraðarinnar, HotelPlanner Tour og fyrrum sigurvegarar á Evrópumótaröðinni. Spennandi verður að fylgjast með Íslandsmeistaranum taka sín fyrstu skref í átt að atvinnumennsku gegn öflugri samkeppni.
Desert Springs Golf Club
Hér má fylgjast með stöðunni hjá Dagbjarti
Haraldur Franklín þurfti ekki að leika á 1. stiginu og komst beint inn í mót vikunnar eftir góðan árangur á HotelPlanner Tour mótaröðinni í sumar. Þar endaði hann í 63. sæti stigalistans, þrátt fyrir að hafa leikið í mikið færri mótum en flestir kylfingar mótaraðarinnar. Hans besti árangur kom á Dormy Open mótinu í Svíþjóð þar sem hann endaði annar og var hársbreidd frá því að leika lokahringinn á 59 höggum.
Haraldur Franklín leikur á Isla Canela Links vellinum í Huelva.
Isla Canela Links
