Aðalfundur GR 2021 – Gísli Guðni Hall nýr formaður félagsins

Aðalfundur GR 2021 – Gísli Guðni Hall nýr formaður félagsins

Aðalfundur Golfklúbbs Reykjavíkur var haldinn á Korpúlfsstöðum á mánudag og var ágætis þátttaka meðal félagsmanna.  Allir þurftu að framvísa neikvæðu hraðprófi við mætingu. Formaður félagsins fór yfir skýrslu stjórnar og fór yfir þau verkefni sem áhersla hefur verið lögð á á árinu. Harpa Ægisdóttir, fjármálastjóri kynnti ársreikning félagsins og fór yfir fjárhagsáætlun komandi starfsárs. Fundarstjóri var Ólafur Arinbjörn Sigurðsson.

Björn Víglundsson kynnti á dögunum að hann ætlaði ekki að sækjast eftir því að sitja áfram sem formaður. Gísli Guðni Hall bauð sig fram til formanns en hann hefur setið í stjórn félagsins frá 2019. Kjörnefnd bárust ekki önnur framboð til formanns og var Gísli því sjálfkjörinn á fundinum.

Brynjar Jóhannesson, Kristín Eysteinsdóttir og Ólafur William Hand voru kosin til tveggja ára á aðalfundi 2020 og sitja því áfram í stjórn.  Elín Sveinsdóttir, Guðmundur Arason og Margeir Vilhjálmsson voru sjálfkjörin stjórn til næstu tveggja ára. Í varastjórn gáfu kost á sér Arnór Ingi Finnbjörnsson, Helga Friðriksdóttir og Þórey Jónsdóttir.

Golfklúbbur Reykjavíkur vill þakka Birni Víglundssyni fyrir vel unnin og óeigingjörn störf í þágu félagsins í öll þau ár sem hann hefur sinnt stjórnarstörfum þar af 7 árum sem formaður. Björn fékk afhent gullmerki félagsins sem þakkarvott á aðalfundi.

Stefán Már Stefánsson vék úr varastjórn að eigin ósk.  Honum eru þökkuð vel unnin störf í þágu félagsins.

Hagnaður á starfsárinu var 99,3 milljónir króna til samanburðar við 102,5 milljónir árið á undan. Tekjur námu alls 567 milljónum samanborið við 544 milljónir á árinu 2020. Golfklúbbur Reykjavíkur annaðist rekstur tveggja golfvalla árinu ásamt rekstri Bása.

Eins og félagsmenn hafa orðið varir við hefur verið hafist handa við endurbætur á Grafarholtsvelli. Framkvæmdir við nýja inniæfingaaðstöðu eru áformaðar.  Viðræður við Reykjavíkurborg um samstarf við fjármögnun eru á góðu skriði og er það forsenda fyrir þessum fyrirhuguðu framkvæmdum.  Einnig eru fyrirhugaðar frekari framkvæmdir á báðum völlum félagsins. Framkvæmdasjóður félagsins stendur vel og spennandi tímar framundan.

Fjárhagsáætlun GR 2022 var samþykkt á aðalfundi og verða félagsgjöld hækkuð um 5% á næsta tímabili, forsendur hækkunar snúa aðallega að launaþróun og hækkun aðfanga eins og áburðar sem hefur hækkað um 30-80% í innkaupum. Gjaldskrá fyrir komandi tímabil verður eftirfarandi: 

Félagsmenn 19-26 ára, kr. 60.000
Félagsmenn 27-70 ára, kr. 120.000
Félagsmenn 71-74 ára, kr. 90.000

Félagsmenn 75 ára og eldri, kr. 90.000 
Félagsmenn 75 ára og eldri*, kr. 60.000
*enda hafi félagi verið í GR í a.m.k. 10 ár

Golfklúbbur Reykjavíkur notast áfram við Nóra félagakerfi við skráningu og innheimtu félagsgjalda. Skráning greiðslufyrirkomulags fer fram í gegnum félagavef https://grgolf.felog.is/ og þurfa félagsmenn að skrá sig inn til að ráðstafa greiðslutilhögun. Áfram er boðið upp á það greiðslufyrirkomulag sem hefur verið undanfarin ár – allt að 5 skipti með kröfum í banka eða allt að 10 skipti með dreifingu á greiðslukort. 

Leiknir hringir á árinu voru 114.012 samanborið við 155.555 árinu á undan og fækkaði því verulega á milli ára. Tímabilið var styttra í báða enda þar sem veður var síðra í ár heldur en undanfarin tvö ár og var af þeim sökum minna spilað á völlum GR.  Þessi mikla aukning sem varð árið 2020 má tengja við áhrif faraldursins sem gerði það að verkum að félagsmenn voru meira heima við og spiluðu almennt meira golf.

Vinavellir voru vel sóttir af félagsmönnum en engu að síður varð fækkun einnig í leiknum hringjum þar sem einnig má tengja við veðurfar. Leiknir hringir á vinavöllum voru alls 6.180.

Golfklúbbur Reykjavíkur vill koma fram þökkum til Ólafi Arinbirni fundarstjóra fyrir faglega og góða fundarstjórn og félagsmönnum fyrir sína þátttöku.

Stjórn, framkvæmdarstjóri og starfsfólk klúbbsins þakkar félagsmönnum fyrir gott starfsár

Til baka í yfirlit