Böðvar Bragi og María Björk sigruðu á Heimslistamótaöðinni um helgina

Böðvar Bragi og María Björk sigruðu á Heimslistamótaöðinni um helgina

Um helgina var annað mót tímabilsins á Heimslistamótaröðinni leikið á Garðavelli, Akranesi og var Golfklúbburinn Leynir framkvæmdaraðili mótsins. Klúbbmeistari okkar GR-inga, Böðvar Bragi Pálsson sigraði í karlaflokki en hann lék samtals á 2 höggum undir pari. Í kvennaflokki var það María Björk Pálsdóttir úr GKG sem stóð uppi sem sigurvegari.

Böðvar Bragi lék samtals á -2 og varð Egill Ragnar Gunnarsson úr GKG í öðru sæti á fjórum höggum frá efsta sætinu, Ingi Þór Ólafson úr GM varð þriðji á samtals +4.

Böðvar Bragi lagði grunninn að sigrinum á öðrum keppnishringnum síðdegis á laugardag. Þar lék hann á 66 höggum eða 6 höggum undir pari. Hann var einu höggi frá vallarmetinu sem er 65 högg – en það setti Kristján Þór Einarsson, GM, á stigamótaröð GSí árið 2016. Tómas Eiríksson Hjaltested, GR, var nálægt því að jafna vallarmetið á lokahringnum þegar hann lék á 66 höggum líkt og Böðvar Bragi.

María Björk Pálsdóttir, GKG, var með nokkra yfirburði í kvennaflokknum, þar sem hún sigraði með sjö högga mun. Arna Rún Kristjánsdóttir, GM, varð önnur og Bjarney Ósk Harðardóttir, GKG varð þriðja. María Björk lék hringina þrjá á +23 höggum yfir pari en Arna Rún lék á +30 höggum yfir pari vallar.

Heimslistamótaröðin er ætlað þeim kylfingum sem vilja bæta stöðu sína á heimslista áhugakylfinga. Alls tóku 26 keppendur þátt, þar af 6 konur. Leiknar voru 36 holur laugardaginn 12. september við nokkuð krefjandi aðstæður á Garðavelli og lokahringurinn fór fram sunnudaginn 13. september við betri aðstæður.

Við óskum sigurvegurum helgarinnar innilega til hamingju með árangurinn!

Golfklúbbur Reykjavíkur

Til baka í yfirlit