Böðvar Bragi Pálsson og Rúnar Arnórsson komnir áfram á lokaúrtökumót Nordic Tour

Böðvar Bragi Pálsson og Rúnar Arnórsson komnir áfram á lokaúrtökumót Nordic Tour

Böðvar Bragi Pálsson úr GR og Rúnar Arnórsson úr GK tryggðu sér báðir sæti á lokaúrtökumóti fyrir Nordic Tour atvinnumótaröðinni þegar þeir tóku þátt á úrtökumótum sem leikin voru á dögunum.

Böðvar Bragi lék á úrtökumóti í Danmörku um síðustu helgi og endaði í 19. sæti en 22 efstu komust áfram. Rúnar endaði í 4. sæti á úrtökumóti sem fram fór í Svíþjóð en þar var leikið á 4 keppnisvöllum og komust um 10 efstu af hverjum velli áfram á lokaúrtökumótið. Lokaúrtökumótið fer svo fram í Svíþjóð dagana 13. - 14. október.

Á lokaúrtökumótinu keppa alls 78 kylfingar (42 frá úrtökumótunum í Svíþjóð, 22 frá danska úrtökumótinu, 7 frá finnska úrtökumótinu og 7 frá norska úrtökumótinu). Þar fá 25 efstu keppnisrétt á Nordic Tour mótaröðinni í styrkleikaflokki 7.  Þeir sem enda í sætum 26 - 50 fá keppnisrétt í styrkleikaflokki 9 og þeir sem eru í sætum 51 og neðar fá keppnisrétt í styrkleikaflokki 12.

Nordic Tour atvinnumótaröðin hefur á undanförnum árum gefið íslenskum atvinnukylfingum tækifæri til þess að komast inn á Áskorenda – og Evrópumótaröðina. Með góðum árangri á Nordic Tour mótaröðinni geta keppendur tryggt sér keppnisrétt á Áskorendamótaröðinni / Challenge Tour.
Axel Bóassson, Guðmundur Ágúst Kristjánsson og Haraldur Franklín Magnús hafa allir fetað þá leið inn á Áskorendamótaröðina.

Til baka í yfirlit