Dómarar GR hafa verið oft spurðir af því síðusta daga hvort vindhögg á teig séu hætt að telja.  Það er stór og mikill misskilningur, vindhögg telja hvar sem er á vellinum.

Líklegast er misskilningur í þessari frétt frá GSÍ - Slóstu vindhögg á teignum?

Þar er sagt: ef boltinn er enn á teignum þá máttu færa boltann innan teigsins og tía hann upp annarsstaðar, eða færa tíið til.  Í eldri reglum þá mátti alls ekki færa boltann eftir að vindhögg var slegið á teig. Þannig að breytingin á reglunum er sú að á meðan boltinn er á teignum máttu færa hann til.

Skilgreining á orðinu „Högg“, segir orðrétt:

Hreyfing kylfunnar fram á við til þess að hitta boltann.

Þó hefur högg ekki verið slegið ef leikmaðurinn:

• Ákveður í framsveiflunni að hitta ekki boltann og nær að koma í veg fyrir það með því að stöðva kylfuhausinn vísvitandi áður en hann nær að boltanum, eða, nái leikmaðurinn ekki að stöðva kylfuhausinn, með því að sveigja kylfuhausinn vísvitandi frá boltanum.
• Hittir boltann af slysni í æfingasveiflu eða við undirbúning fyrir höggið.

Regla 6.2b (6) segir orðrétt:

Þegar bolti í leik liggur á teignum. Ef bolti leikmannsins er í leik og liggur á teignum eftir högg (t.d. tíaður bolti eftir vindhögg) eða eftir að leikmaðurinn tók lausn, má hann:

• Lyfta eða hreyfa boltann vítalaust (sjá undantekningu 1 við reglu 9.4b), og
• Leika boltanum eða öðrum bolta hvaðan sem er af teignum, af tíi eða jörðinni samkvæmt (2), þar á meðal má hann leika boltanum þar sem hann liggur.

Þetta merkir að á meðan boltinn liggur á teignum (innan teigmerkjanna), þá má tía boltann upp aftur, þó búið sé að taka vindhögg og þú boltinn fljúgi einhverja metra fari í stein og komi til baka, þ.e. á meðan hann liggur á skilgreindum teig.

Skilgreiningin á Teig er orðrétt:

Svæðið þaðan sem leikmaðurinn verður að leika til að hefja leik á holunni sem hann er að leika.

Teigurinn er ferhyrnt svæði sem er tveggja kylfulengda djúpt og:

• Að framan afmarkast svæðið af línunni á milli fremstu brúna tveggja teigmerkja, eins og þau eru staðsett af nefndinni.
• Til hliðanna afmarkast svæðið af línum aftur frá ystu brúnum teigmerkjanna.

Teigurinn er eitt fimm skilgreindra svæða vallarins.

Öll önnur teigstæði á vellinum (hvort sem er á sömu holu eða á öðrum holum) eru hluti almenna svæðisins.