Fyrsti vinavöllur GR 2021 er Kirkjubólsvöllur – opið inn á sumarflatir

Fyrsti vinavöllur GR 2021 er Kirkjubólsvöllur – opið inn á sumarflatir

Fyrsti vinavallasamningur ársins 2021 hefur nú verið undirritaður og er það Kirkjubólsvöllur hjá Golfklúbbi Sandgerðis. Klúbbarnir hafa átt gott samstarf á undanförnum árum og okkur þykir ánægjulegt að tilkynna félagsmönnum þennan áframhaldandi kost í vinavöllum.

Golfklúbbur Sandgerðis var stofnaður 24. apríl 1986 og hefur verið í stöðugri uppbyggingu síðan. Völlurinn er strandarvöllur, staðsettur að Vallarhúsum, sem liggur mitt á milli Sandgerðis og Garðs. Hjá Golfklúbbi Sandgerðis er öll sú þjónusta sem kylfingar óska eftir þegar vinavöllur er heimsóttur - glæsilegt klúbbhús sem býður upp á fyrsta flokks veitingar og púttflöt þar sem hægt er að æfa stutta spilið.

Kirkjubólsvöllur er opinn inn á sumarflatir og hvetjum við félagsmenn til að nýta sér þennan vinavallasamning strax og hefja upphitun fyrir komandi tímabil. Rástímabókanir fara fram í gegnum Golfbox og er hægt að ganga frá greiðslu vallargjalds þegar mætt er til leiks.

Sömu reglur gilda á Kirkjubólsvelli eins og áður á vinavöllum, félagsmenn Golfklúbbs Reykjavíkur greiða kr. 3.000 í vallargjald í hvert sinn er þeir leika Kirkjubólsvöll og skiptir þá ekki máli hvort leiknar séu 9 eða 18 holur. Áður en leikur hefst skulu félagar staðfesta félagsaðild sína og greiða vallargjald í afgreiðslu. Samkomulagið gildir ekki ef félagsmenn leika með hópum, sem gert hafa sérstaka samninga um afslætti af vallargjöldum, eins og t.d fyrirtækjamót.

Upplýsingar um vinavelli félagsins er að finna hér á vefnum undir "Golfvellir - Vinavellir"

Við hlökkum til að kynna fleiri vinavelli fyrir félagsmönnum á komandi vikum!

Golfklúbbur Reykjavíkur

 

Til baka í yfirlit