Lokamótið á Heimslistamótaröðinni – skráning hefst kl. 13:00 í dag

Lokamótið á Heimslistamótaröðinni – skráning hefst kl. 13:00 í dag

Lokamótið á Heimslistamótaröðinni verður leikið á Korpúlfsstaðavelli dagana 25. og 26. september næstkomandi og verða lykkjur mótsins Sjórinn/Áin. Eins og nafnið gefur til kynna er mótið ætlað þeim kylfingum sem vilja bæta stöðu sína á heimslista áhugakylfinga.

Skráning í Heimslistamótið hefst á Golfbox kl. 13:00 í dag. Hámarskfjöldi keppenda er 39 en leiknar verða alls 54 holur á tveimur keppnisdögum, 18 holur á fyrri keppnisdeginum og 36 holur á lokakeppnisdeginum.

Þátttakendur skulu skrá sig í mótið fyrir kl. 23:59 á miðvikudegi fyrir mót, 23. september.

Leikfyrirkomulag
Höggleikur í flokki karla og kvenna, alls 54 holur. Leiknar eru 18 holur fyrri mótsdag og 36 holur seinni mótsdag. Keppt skal samkvæmt móta- og keppendareglum GSÍ.

Rástímar og ráshópar
Rástímar verða birtir á Golfbox eftir kl.13:00 á fimmtudeginum fyrir mót. Á fyrsta keppnisdegi raðar mótsstjórn í ráshópa en síðan verður raðað út eftir skori. Á fyrri keppnisdegi verður ræst út frá kl. 12:00, seinni keppnisdag verður fyrri hringur ræstur út kl.08:00 og seinni hringur ræstur út kl.13:00.

Ath. að þessir tímar eru til viðmiðunar og geta breyst.

Þátttökuréttur
Hámarksfjöldi kylfinga í mótið er 39. Þátttökurétt hafa atvinnu- og áhugamenn. Í karlaflokki er hámarksforgjöf 5,5 og í kvennaflokki 8,5 og skulu keppendur vera meðlimir í golfklúbbi innan GSÍ. Ef skráningar eru fleiri en hámarksfjöldinn falla niður skráningar þeirra leikmanna sem næstir eru forgjafarmörkum síns kyns. Þó skulu að lágmarki níu leikmenn eiga rétt á þátttöku af hvoru kyni. Ef tveir eða fleiri kylfingar eru jafnlangt frá forgjafarmörkum síns kyns ræður hlutkesti því hverjir fá þátttökurétt. Ef fjöldi kylfinga sem fá þátttökurétt af hvoru kyni er ekki heilt margfeldi af þremur er hámarksfjöldi leikmanna aukinn svo að þrír keppendur verði í hverjum ráshópi.

Þurfi að skera niður fjölda þátttakenda skulu forgjafarlægstu keppendur að morgni 25. september fá þátttökurétt. Standi val á milli keppenda með jafnháa forgjöf skal hlutkesti ráða.

Karlar leika af hvítum teigum og konur af bláum teigum.

Þátttökugjald er 8.000 kr.

Skráning og þátttökugjald
Þátttakendur skulu skrá sig í mótið á golf.is fyrir kl. 23:59 á miðvikudegi fyrir mót. **Engar undantekningar á skráningu verða leyfðar í mótið eftir að skráningu lýkur.** Þátttökugjöld verða ekki endurgreidd ef afboðun kemur eftir að skráningarfresti lýkur. Forföll skal tilkynna með tölvupósti á netfangið harpa@grgolf.is

Æfingahringur
Einn æfingahringur án endurgjalds er heimilaður. Vinsamlegast hafið samband við klúbbinn til að panta rástíma. Skilyrði fyrir æfingahring er að búið sé að greiða þátttökugjald.

Keppendur fá æfingabolta í Básum fyrir hring án endurgjalds á mótsdögum.

Verðlaun
Veitt verða verðlaun fyrir 1. – 3. sæti í flokki karla og kvenna.

Ef keppendur eru jafnir í fyrsta sæti verður leikinn bráðabani, en að öðru leyti gilda móta- og keppendareglur GSÍ. Ef keppendur eru jafnir í öðrum sætum skiptast verðlaun jafnt milli þeirra keppenda. Gert er ráð fyrir að verðlaunaafhending hefjist 15 mínútum eftir að síðasti ráshópur lýkur leik.

Til baka í yfirlit