Kristófer Karl Karlsson, GM, og Heiðrún Anna Hlynsdóttir, GOS, stóðu uppi sem sigurvegarar í Korpubikar Golfklúbbs Reykjavíkur. Mótsmet og vallarmet féllu bæði í karla- og kvennaflokki. Þetta var fimmta mótið á GSÍ mótaröðinni í sumar og það síðasta fyrir Íslandsmótið í golfi.
Leikinn var 54 holu höggleikur án forgjafar. Niðurskurður var eftir annan keppnisdag þannig að einungis efstu 70% af kylfingum héldu áfram leik.
Úrslit kvenna
Í kvennaflokki lék Heiðrún Anna best. Hún setti mótsmet kvenna í Korpubikarnum og var ellefu undir pari í heildina. Heiðrún leiddi með níu höggum fyrir lokahringinn og var sigurinn aldrei í hættu. Hún tapaði einungis fjórum höggum í mótinu, og fékk fimmtán fugla. Þetta er fjórði sigur Heiðrúnar í jafnmörgum mótum í sumar, en hún hefur nú þegar tryggt sér stigameistaratitilinn í kvennaflokki.
Perla Sól Sigurbrandsdóttir varð önnur, en hún sló í dag vallarmet með ótrúlegri spilamennsku. Hún lauk leik á 63 höggum, fékk tvo erni, fimm fugla og tapaði ekki höggi. Þetta var fyrsta mót Perlu á GSÍ mótaröðinni í sumar, en næsta verkefni hennar er EM einstaklinga, sem fer fram í Þýskalandi á næstu dögum.
Auður Bergrún Snorradóttir endaði í þriðja sæti mótsins eftir frábæran lokahring upp á 67 högg. Hún var tvo undir pari í heildina og fékk fimmtán fugla á hringjunum þremur. Enginn kylfingur í kvennaflokki fékk fleiri fugla, en Heiðrún Anna var með jafn marga.
Úrslit karla
Kristófer var fjórði fyrir lokahringinn, en lék frábært golf í dag. Hann spilaði á 63 höggum, átta undir pari, fékk tvo erni, fimm fugla og einn skolla á hringnum. Kristófer lék mótið í heild sinni 17 undir pari. Hann tryggði sigurinn með frábæru pútti á 18. holunni, og sló í leiðinni mótsmet karla í Korpubikarnum. Besta heildarskorið átti Axel Bóasson, 16 undir pari.
Tómas Eiríksson Hjaltested, GR, endaði í öðru sæti mótsins. Tómas leiddi mótið fyrir lokadaginn eftir vallarmet á öðrum hring. Þrátt fyrir góða spilamennsku reyndust 16 högg undir pari ekki nóg til sigurs. Tómas lék fjóra undir pari í dag, fékk örn, sex fugla, tvo skolla og einn tvöfaldan. Þetta er í þriðja skiptið í sumar sem Tómas endar í öðru sæti á GSÍ mótaröðinni, og hefur hann verið á meðal efstu fimm kylfinganna í öllum mótum.
Dagbjartur Sigurbrandsson, GR, endaði þriðji á fjórtán höggum undir pari. Dagbjartur lék á 67 höggum í dag og var í baráttu um sigurinn allt mótið.
Inn á heimasíðu GSÍ má lesa nánari lýsingu á keppnisdögunum.
Golfklúbbur Reykjavíkur í samvinnu við First Water óskar verðlaunahöfum innilega til hamingju sem og þátttakendum öllum fyrir frábært mót.
