Forskot, afrekssjóður, mun styðja við bakið á alls fimm atvinnukylfingum á árinu 2024.
Forskot hefur frá árinu 2012 úthlutað styrkjum til afrekskylfinga og er úthlutunin í ár sú 13. í röðinni.
Að sjóðnum standa: Eimskip, Íslandsbanki, Icelandair, Vörður tryggingar, Bláa Lónið og Golfsamband Íslands.
Frá stofnun sjóðsins hefur markmiðið að gera styrkþegum auðveldara fyrir að æfa og keppa við bestu skilyrði í samræmi við það sem gerist á alþjóðlegum vettvangi í golfíþróttinni.
Axel Bóasson, Bjarki Pétursson, Guðrún Brá Björgvinsdóttir, Haraldur Franklín Magnús og Ragnhildur Kristinsdóttir fá úthlutað úr sjóðnum í ár.
Axel Bóasson er fæddur árið 1990 og hann hefur þrívegis fagnað Íslandsmeistaratitlinum í golfi. Axel gerðist atvinnukylfingur árið 2013. Axel er með keppnisrétt á Challenge Tour mótaröðinni sem er í næst efsta styrkleikaflokki atvinnumótaraða í Evrópu í karlaflokki.
Bjarki Pétursson er fæddur árið 1994 og hann varð Íslandsmeistari árið 2020. Bjarki hefur verið atvinnukylfingur árið 2019 en hann með keppnisrétt á Nordic Golf League.
Guðrún Brá Björgvinsdóttir er fædd árið 1994 og hún gerðist atvinnukylfingur árið 2018. Guðrún Brá hefur þrívegis fagnað Íslandsmeistaratitlinum í golfi. Guðrún Brá tryggði sér keppnisrétt á LET Evrópumótaröðinni árið 2020 eftir að hafa leikið á LET Access mótaröðinni frá árinu 2018. Guðrún Brá er með keppnisrétt á LET Access mótaröðinni á þessu tímabili.
Haraldur Franklín Magnús er fæddur árið 1991 en hann gerðist atvinnukylfingur árið 2017. Hann er með keppnisrétt á Challenge Tour, Áskorendamótaröðinni, sem er næst efsti styrkleikaflokkur hjá atvinnukylfingum í karlaflokki í Evrópu. Haraldur Franklín, varð Íslandsmeistari í golfi árið 2012, og mun hann leika á fjölmörgum mótum á Challenge Tour á keppnistímabilinu.
Ragnhildur Kristinsdóttir er fædd árið 1997 og er ríkjandi Íslandsmeistari í golfi. Hún er á sínu öðru ári sem atvinnukylfingur. Ragnhildur fór í úrtökumótið fyrir LET Evrópumótaröðina í annað sinn í desember á síðasta ári. Hún er með keppnisrétt á LET Access atvinnumótaröðinni á þessu tímabili, sem er næst sterkasta atvinnumótaröð Evrópu hjá atvinnukonum í golfi.
Markmiðið með stofnun Forskots afrekssjóðs árið 2012 var að búa til reynslu og þekkingarbrunn sem skili sér til kylfinga framtíðarinnar og ungir kylfingar geti litið til í sínum framtíðaráætlunum.
Ríkar kröfur eru gerðar til þessara íþróttamanna um ráðstöfun styrkjanna. Ber þeim að leggja fram æfinga- og keppnisáætlanir auk fjárhagsáætlunar fyrir verkefni sín auk þess sem gerðir eru sérstakir samningar við hvern kylfing um að þeir virði reglur Íþrótta- og Ólympíuhreyfingarinnar.
Þeir kylfingar sem fá úthlutað úr Forskoti afrekssjóði eru sterkar fyrirmyndir. Það að eiga afreksmenn í íþróttum er stór og mikilvægur þáttur í því að fá börn og unglinga til að sinna íþróttum. Því er litið á sjóðinn sem mikilvægt skref til að efla íþróttir barna og unglinga og hvetja þau til dáða.
Einn fulltrúi frá þeim sem aðild eiga að Forskoti er í stjórn sjóðsins og auk þess hefur stjórn sér til ráðgjafar fagteymi sem gerir tillögur um úthlutanir úr sjóðnum.
