Grafarholtsvöllur var hannaður af Svíanum Nils Sköld og var leikið á fyrstu holunum árið 1963, sem gerir völlinn 62 ára gamlan í ár, 2025. Völlurinn hefur haldist vel í gegnum árin og er enn talinn meðal bestu valla landsins.
Völlurinn er hæðóttur og getur reynst erfiður viðureignar, sér í lagi óreyndum kylfingum. Það er þó mál manna að þegar golfið gengur vel þá eru fáir vellir skemmtilegri en Grafarholtsvöllur. Völlurinn hefur iðulega verið notaður í Íslandsmótum og öðrum stærri golfmótum.
Félagsmönnum GR er heimilt að taka með sér gest á völlinn og fá fyrir hann 50% afslátt af fullu vallargjaldi, 70% afsláttur er veittur af vallargjaldi séu börn á aldrinum 6-18 ára í fylgd með félagsmanni GR og verður vallargjald þá kr. 5.270. Afsláttur þessi gildir fyrir kl. 14:00 á virkum dögum og eftir kl. 14:00 um helgar.
