Um GR
Upphafið
Golfklúbbur Reykjavíkur var stofnaður þann 14. desember 1934 undir nafninu Golfklúbbur Íslands enda þá eini golfklúbbur landsins. Nafninu var breytt í Golfklúbbur Reykjavíkur (GR) þegar fleiri golfklúbbar höfðu verið stofnaðir á Íslandi.
Stofnun klúbbsins má rekja til Kaupmannahafnar en þar voru Íslendingar við nám og störf sem höfðu kynnst golfíþróttinni. Sumir þessara manna urðu áberandi í íslensku þjóðfélagi. Má þeirra á meðal nefna Svein Björnsson fyrsta forseta Íslands, Gunnlaug Einarsson lækni sem var formaður klúbbsins fyrstu árin og Valtý Albertsson lækni.
Fyrsta golfmót klúbbsins var haldið í Laugardalnum sumarið 1935. Mótið var stórviðburður í borgarlífi Reykjavíkur. Héldu margir að um stundargaman hjá heldra fólki borgarinnar væri að ræða. Raunin varð önnur. Fyrir þrotlausa vinnu og takmarkalausan áhuga forystumanna klúbbsins náði golfíþróttin að dafna í Reykjavík og víðar um landið. GR var gert að flytja völl sinn úr Laugardalnum og var klúbbnum í staðinn úthlutað svæði við Öskjuhlíð í landi Leynimýrar fyrir nýjan golfvöll. Fyrstu árin deildu kylfingar landinu með beljum Reykvíkinga sem þangað sóttu næringu.
Golfvöllurinn við Öskjuhlíð var vígður 1.ágúst 1938. Ingiríður, þá krónprinsessa Danmerkur og Íslands og síðar Danadrottning, sýndi klúbbnum þá vinsemd að mæta og slá jafnframt fyrsta höggið við vígsluna. Var hún útnefnd verndari klúbbsins og er það enn í dag. Hefur mynd af henni átt virðulegan sess í klúbbhúsinu í Grafaholti allt fram á þennan dag.
Uppbygging í Leynimýri
Öskjuhlíðavöllur í Leynimýri var 9 holur. Golfskálinn þar var ekki stór en starfsemin engu að síður mjög lífleg. Upp úr 1950 fóru borgaryfirvöld og stjórnmálamenn að líta til landsins sem völlurinn stóð á og töldu landið nýtast betur sem byggingalóðir heldur en íþrótta- og útivistarsvæði. Að því kom að GR var gert að flytja starfsemi sína í Grafarholtið sem þá var að mestu óræktarland í útjaðri borgarinnar. Félagsmennirnir létu ekki deigan síga og þeim tókst að byggja í Grafarholtinu fallegan og góðan golfvöll þótt aðstæðurnar til þess væru mjög erfiðar ekki síst fyrir þær sakir að svæðið var bæði grýtt og jarðvegssnautt.
Grafarholtsvöllur
Svíinn Nils Sköld hannaði völlinn og ekki hægt að segja annað en að hönnunin hafi tekist afburðavel. Völlurinn er felldur inn í landslagið og brautirnar því hver annarri ólíkar. Mikilvægt er að hitta brautirnar því utan þeirra tekur holtið við með öllu sínu grjóti. Árið 1963 var byrjað að leika á nokkrum holum vallarins og smám saman bættust holur við þar til fullbúinn 18 holu völlur var tekinn í notkun 1968.
Grafarholtsvöllurinn er góður golfvöllur sem enn er í endurbyggingu þar sem markmiðið er að gera völlinn enn betri. Af öftustu teigum er völlurinn rúmlega 6.000 metrar. Völlurinn hefur fengið margar alþjóðlegar viðurkenningar. Völlurinn þykir nokkuð erfiður til göngu vegna þess hversu mishæðóttur hann er. Nokkur fjölþjóðleg mót hafa verið haldin á Grafarholtsvelli – Norðurlandameistaramót þrisvar sinnum auk Evrópumeistaramóts drengja og Evrópumeistaramóts öldunga.
Korpúlfsstaðavöllur
Golfklúbbur Reykjavíkur byggði 12 holu æfingavöll við Korpúlfsstaði. Árið 1993 var ráðist í gerð nýs 18 holu vallar á landinu. Hannes Þorsteinsson, golfvallarhönnuður, hannaði völlinn. Bygging vallarins gekk bæði hratt og vel fyrir sig. Í júní árið 1996 voru vígðar fyrstu 9 holurnar á nýjum Korpúlfsstaðavelli og ári síðar, 1997 voru allar 18 holurnar teknar í notkun og Korpúlfsstaðavöllur formlega vígður með Landsmóti golfklúbba í júlí 1997. Klúbburinn samdi við Reykjavíkurborg um afnot af húsnæðinu í austurenda Korpúlfsstaða sem félagsaðstöðu. Þar er nú góður veitingasalur, skrifstofur klúbbsins, geymslur og inniæfingaaðstaða á efri hæð sem hægt er að nýta yfir vetrarmánuðina. Korpúlfsstaðavöllur hefur verið stækkaður í 27 holur og var nýjasti hluti vallarins formlega opnaður árið 2014. Vellinum er skipt í þrjár 9 holu lykkjur sem nefnast – Sjórinn, Áin og Landið. Með þessum hætti skapast skilyrði til þess að bjóða félagsmönnum að velja um leik á 18 holu og 9 holu velli á Korpúlfsstöðum.
Þessu til viðbótar er 9 holu völlur, Thorsvöllur, á Korpúlfsstaðasvæðinu. Völlurinn er styttri en aðrir vellir GR og er meðal annars hugsaður fyrir þá sem eru byrjendur í golfi sem og börn og eldri kylfinga. Hann er eini völlur GR sem er jafnan opinn að vetri til
Mót og félagsstarf
Korpúlfsstaðavöllur er samtals 8.401 m að lengd lagður í stórkostlegri náttúru þar sem laxveiðiáin Korpa og ströndin í Grafarvogi spila stórt hlutverk. Af gulum teigun er lykkjur vallarins Sjórinn 2.780 m, Áin 2.799 m og Landið 2.822 m. Lengd 18 holu vallarins á Korpu er því mismunandi eftir því hvaða lykkjur eru leiknar hverju sinni
