Bændaglíma GR 2022 – þema verður villta vestrið, klæðum okkur upp sem kúreka og indíána

Bændaglíma  GR 2022 – þema verður villta vestrið, klæðum okkur upp sem kúreka og indíána

Það er ekki hægt að ljúka golfsumrinu án þess að halda síðasta innanfélagsmót ársins, sjálfa Bændaglímuna sem verður í ár haldin laugardaginn 24. september á Grafarholtsvelli. Ræst verður út af öllum teigum kl. 12:00 og verður þema dagsins kúrekar og indíánar.

Tekið verður á móti þátttakendum með léttum veitingum og öðrum veigum – föstum og fljótandi. Keppendur lenda í pyluspartýi út á velli og munu stelpurnar í kvennanefnd keyra um og halda stemmningunni út á velli gangandi.

Bændur verða menn sem þekkja völlinn og hindranir hans vel, þeir Ellert yfirvallarstjóri og Darren vallarstjóri Grafarholts og munu keppendur skiptast í lið þeirra, índíána og kúreka.

Mótsgjald er kr. 7.500 á mann og greiðist hjá veitingasala þegar mætt er til leiks. Mæting í klúbbhús kl. 11:00 og ræst út af öllum teigum samtímis kl. 12:00.

Skráning í Bændaglímu hefst mánudaginn 19. september kl. 13:00 og fer fram í rástímabókun á Golfbox: Valinn er völlurinn „Bændaglíma GR 2022“ á dagsetningu mótsins 24.09.2022. Hámarksfjöldi er 124 keppendur. Mikilvægt er að þeir sem ætla að spila saman í liði séu skráðir saman í rástíma. Daginn fyrir mót verða réttir rásteigar sendir út á keppendur.

Að leik loknum verður blásið til borðhalds í Grafarholtsskála og ætla vertarnir okkar, þau Guðmundur og Mjöll að bjóða upp á eftirfarandi:

  • Kornalin kjúklingabringa með villisvepparisotto, fersku klettasalati, parmesan og madeiragljáa
  • Kaffi og úrval af sætum bitum í eftirrét

Jóhann Alfreð, sem er félagsmönnum og reyndar landsmönnum flestum vel kunnugur mun sjá um veislustjórn og verðlaunaafhendingu. Það verður gaman að fylgjast með stemmningunni sem mun fylgja því að koma friði á í villta vestrinu að leik loknum!

Leikfyrirkomulag mótsins er Texas scramble höggleikur með forgjöf, fjórir leikmenn saman í liði. Forgjöf liðs er samanlögð vallarforgjöf leikmanna deilt með 10. Hámarksforgjöf sem gefin er til hvers leikmanns er 36. Til að gera leikinn ennþá skemmtilegri verður eftirfarandi regla í gildi: Skylt verður að velja að minnsta kosti tvö teighögg frá hverjum liðsmanni.  Annað hinna völdu teighögga verður að vera á par 3 holu.

Veitt verða verðlaun fyrir þrjú efstu sætin í liðakeppni og nándarverðlaun þeim leikmanni sem næstur er holu eftir upphafshögg á öllum par 3 holum vallarins.

Félagsmenn mega eiga von á hressandi kvöldi í frábærum félagsskap á þessu lokakvöldi tímabilsins.

ATH! Skráningu lýkur kl. 12:00 föstudaginn 23. september.

Við minnum á að aldurstakmark til þátttöku í Bændaglímu er 20 ár.

Hlökkum til að sjá ykkur!
Golfklúbbur Reykjavíkur

Til baka í yfirlit