Stefnt að opnun Korpu laugardaginn 7. maí

Stefnt að opnun Korpu laugardaginn 7. maí

Stefnt er að opnun Korpu laugardaginn 7. maí næstkomandi og Grafarholts viku síðar eða laugardaginn 14. maí. Veðurfar hefur verið gott undanfarna daga og hafa vellirnir tekið á sig grænan lit sem er góð byrjun og vekur félagsmenn til tilhlökkunar.

Miklar framfarir hafa verið á völlunum að undanförnu en klaki er nýlega farinn úr jörðu víða og stór svæði þurfa nú tíma til að þorna áður en hægt er að hleypa umferð inn á þau af fullum krafti. Nokkrar brautir eru enn verulega blautar og grunnvatnsstaða á Korpúlfsstöðum há. Völtun brauta er komin vel af stað á Korpu og verður í beinu framhaldi farið að valta í Grafarholti.

Vallarstarfsmenn vinna hörðum höndum að þeim verkefnum sem nauðsynlegt er að ljúka áður en vellir klúbbsins opna. Viðhald göngustíga, kantskurður á glompum, yfirferð á merkingum, söndun og sláttur teiga og flata, áburðardreifing á brautir, hreinsun svæða, sópun á bílaplönum, viðhaldi klósettaðstöðu, standsetningu vökvunarkerfis eru til dæmis þau verkefni sem unnið er að.  

Miklar nýframkvæmdir hafa verið unnar á völlum klúbbsins á liðnum vetri. Nýir teigar eru í byggingu á 17. braut Korpúlfsstaða, nýir teigar á 1. braut í Grafarholti og unnið er að sléttun 18. brautarinnar þar sömuleiðis.

Gangi öll verkefni eftir eins og lagt er upp með í dag verður hægt að opna velli klúbbins, í sínu besta mögulega ástandi, eins og áður sagði – Korpuna 7. maí og Grafarholtið 14. maí.

Nánari upplýsingar um opnun valla verða sendar út þegar nær dregur.

Golfklúbbur Reykjavíkur

Til baka í yfirlit