Ragnhildur Kristinsdóttir og Andrea Bergsdóttir léku á fyrra stigi úrtökumótsins fyrir LET Evrópumótaröðina 2025 en LET er í efsta styrkleikaflokki atvinnumótaraða í kvennaflokki í Evrópu.
Ragnhildur lék vel á Samanah vellinum og endaði jöfn í efsta sæti (72, 70, 70) og tryggði sér sæti á öðru stigi úrtökumótsins. Andrea hafnaði í 26. sæti (71, 76, 76) á Palm Golf Ourika vellinum og komst ekki áfram á annað stigið. 23 efstu kylfingarnir komust áfram á annað stigið.
Alls voru 248 leikmenn skráðir til leiks, sem er metþátttaka, og er keppt á fjórum völlum á Lalla Aicha golfsvæðinu í Marokkó. Til samanburðar voru 221 keppandi á 1. stigi úrtökumótsins í fyrra.
Leiknir voru þrír 18 holu hringir eða alls 54 holur á þremur keppnisdögum og keppa leikmenn alltaf á sama vellinum.
Á fyrra stigi úrtökumótsins er keppt um laus sæti á lokaúrtökumótinu sem fer einnig fram í Marokkó dagana 16.-20. desember. Guðrún Brá Björgvinsdóttir vann sér inn keppnisrétt beint á lokaúrtökumótið með góðum árangri á LET Access mótaröðinni í ár þar sem hún endaði í 21. sæti á stigalistanum.
Ragnhildur og Guðrún Brá munu því leika á lokaúrtökumótinu í Marokkó 16.-20. desember.
